Начинот на плаќање е последната врата пред парите. Ако е тесна или сомнителна, целиот труд пред неа е залуден. Еве ги трите начина што реално се користат кај нас.
1. Плаќање при достава (наложена уплата)
WooCommerce → Settings → Payments → Cash on delivery → Enable. Во описот напишете јасно: „Плаќате готово на курирот при преземање“. Дел од купувачите кај нас сè уште му веруваат само на ова — вреди да го имате, дури и ако сакате да ги придвижите кон картичка.
2. Директна уплата на банкарска сметка
Payments → Direct bank transfer (BACS) → внесете име на сметка, банка, сметка/IBAN. Купувачот ги гледа податоците на крајот и во мејлот за нарачка. Совет: во описот побарајте бројот на нарачката да го напише како цел на дознака — така книговодството не бара со часови.
3. Картично плаќање (CaSys / cPay преку банка)
Ова е единствениот начин со кој наплаќате ВЕДНАШ, и кој ги отсекува непреземените пратки. Патот е:
- Договор со банка — Комерцијална (cPay), НЛБ или Халк; банката бара регистрирана фирма, сајт со услови и политика на приватност, и податоци за фирмата видливи на сајтот
- Технички податоци — банката ви издава идентификатори за продавачот и тајни клучеви
- Модул — се инсталира и се поврзува со тие податоци; ние го правиме ова со нашите Премиум модули
- Тест трансакции — банката дава тест-режим; се тестира цела нарачка, потврда, и повратна врска кон сајтот
- Живо — по одобрување, се префрла во продукција
Провизијата по трансакција ја одредува банката — прашајте однапред, разликите постојат.
Задолжителниот тест пред првата нарачка
- Направете вистинска мала нарачка со секој начин на плаќање
- Проверете: статус на нарачката, мејл до вас, мејл до купувачот, износ до денар
- Проверете и што се случува при ОТКАЖАНО плаќање — купувачот мора да се врати на сајтот со јасна порака
Совет за конверзии
Логоата на картичките и „безбедно плаќање“ до копчето, плус видлив телефон — ги смируваат оние што првпат купуваат кај вас. И: мал попуст за онлајн плаќање тивко ја менува навиката од наложена кон картичка.