Бавен сајт — виновен е хостингот или сајтот?

Сајтот е бавен. Првата мисла: „хостингот е слаб, треба посилен“.

Понекогаш е точно. Почесто не е — и надградбата само значи побавен сајт на поскап сервер.

Тестот од две минути

Направете празна страница на серверот. Фајл test.php со само:

<?php echo "ok"; ?>

Отворете ја и погледнете колку трае.

Под 200 милисекунди — серверот е во ред. Проблемот е во сајтот.

Над секунда — серверот е преоптоварен или далеку.

Тоа е разликата меѓу „треба ми подобар хостинг“ и „треба ми расчистување“.

Кога е навистина хостингот

Споделен сервер со преполно соседи. На евтините планови стотици сајтови делат ресурси. Кога некој од нив ќе добие налет, сите се забавуваат.

Локација. Сервер во Америка за македонски посетители додава 150-200 милисекунди на секое барање. За сајт со многу елементи тоа се собира.

Стара PHP верзија. PHP 8 е речиси двојно побрз од 7.4. Ова е хостинг подесување, но менувањето е бесплатно.

Без SSD. Денес е стандард, но има уште планови на стари дискови.

Кога е сајтот — почесто

Слики од 4 MB. Најчестата причина, и нема сервер што ја решава.

Триесет плагини од кои половина се непотребни.

Градач на страници што вчитува кило CSS за да прикаже три реда текст.

Без кеширање. Секој посетител предизвикува целосна пресметка од нула.

Надуена база. Години ревизии, спам коментари и остатоци од избришани плагини.

Редослед што штеди пари

1. Тестот со празната страница — кажува каде е проблемот
2. Ако е сајтот: слики, кеш, плагини — по тој редослед
3. PHP на најнова верзија
4. Мерете повторно
5. Дури потоа размислувајте за посилен хостинг

Во повеќето случаи по третиот чекор надградбата веќе не е потребна.

Кога надградбата е оправдана

Ако сте направиле сè од горе, а серверот сепак одговара бавно — тогаш да. Особено ако имате продавница со многу производи или сообраќај што расте.

Но тогаш надградувате со причина, не со надеж.