Блогот е најевтиниот начин да ве најдат на Google — но само ако објавувате. Еве го целиот процес, без ништо да се прескокне.
1. Отворете нова објава
Најавете се на vasdomen.mk/wp-admin → во левото мени Објави → Додај нова (Posts → Add new). Не мешајте со Страници — за разликата има посебна статија.
2. Насловот е половина работа
Пишувајте го како прашање или ветување, со зборовите што луѓето ги бараат: „Колку чини поправка на бојлер во Штип“ носи повеќе од „Нашите услуги“. Насловот станува и адреса (permalink) — проверете дека е убава и кратка, без датуми и бројки.
3. Текстот — во блокови
Пишувате параграф, притискате Enter — тоа е нов блок. За наслов во текстот: напишете го, па изберете Наслов H2 од алатникот. Правило: пасус од 2-4 реченици, поднаслов на секои 150-200 збора. Луѓето скенираат, не читаат.
4. Трите работи што сите ги забораваат
- Категорија — десно; секоја објава во една категорија. Без неа, сè паѓа во „Без категорија“ и блогот изгледа запуштено.
- Истакната слика — десно долу; тоа е сликата во листата и при споделување на Facebook
- Внатрешни линкови — 1-2 линка кон ваши страници (услуга, контакт, поврзана објава). Тоа го држи посетителот и му помага на Google.
5. Проверка пред објава
Кликнете Преглед (Preview) → и погледнете го на мобилен. Проверете: наслови, слики, линкови што работат, без црвени правописни грешки.
6. Објави
Копче Објави горе десно. Ако не сте сигурни — Зачувај како нацрт, или закажете за подоцна (има статија и за тоа).
7. По објава
Споделете на Facebook и во вашата е-маил листа. За постари сајтови: во Search Console → URL Inspection → Request indexing, за Google да дојде побрзо.
Совет
Не чекајте совршенство. Објава од 600 збора што решава ЕДЕН вистински проблем на вашиот клиент вреди повеќе од три недели пишување на „големата“ статија што никогаш не излегува.