Најчестото недоразбирање кај првата онлајн продавница: сопственикот мисли дека плаќањето со картичка се вклучува со плагин. Плагинот е последниот чекор. Пред него има банка, договор и одобрување.
Кој е кој
Прочитај и
- CaSys — процесорот што ги обработува картичните трансакции за повеќе домашни банки.
- cPay — платежната порта (gateway) преку која вашата продавница праќа плаќање до CaSys. cPay има преглед на плаќања и извештаи, верификација и зачувување картичка (Card on File), можност за линк за плаќање (PayByLink) и справување со ризици преку црна/бела листа.
- Вашата банка — таа ви го одобрува трговското место и таму слегуваат парите. Дел од домашните банки работат преку cPay/CaSys; NLB има свое решение (NLB Pay).
Целиот пат, по редослед
- 1. Регистрирана фирма. Нема картично плаќање на физичко лице.
- 2. Избор на банка што соработува со CaSys — најдобро таму каде веќе имате сметка.
- 3. Барање и договор. Банката бара документи за фирмата и го проверува сајтот: што продавате, услови за користење, политика за враќање, контакт податоци, цени со ДДВ. Ова не е формалност — тука најчесто застанува постапката.
- 4. Одобрување и податоци за интеграција. Добивате пристапни податоци, прво за тест околина.
- 5. Интеграција — преку API или преку модул за WooCommerce. Ние имаме сопствен модул за cPay/CaSys, како и за Halk Bank и NLB Pay — значи не купувате туѓ плагин и не зависите од трето лице кога банката ќе смени нешто.
- 6. Тест трансакции → па преминување во live режим со нови податоци.
По искуство, чекорите со банката се најбавниот дел — сметајте на недели, не на денови. Затоа: почнете ја постапката додека сајтот се прави, не откако ќе биде готов.
Што бараат банките на сајтот (подгответе однапред)
- Јасни податоци за фирмата: назив, адреса, ЕДБ, контакт телефон
- Услови за користење и политика за враќање и рекламации
- Цени со вклучен ДДВ и трошоци за достава
- Опис на производите и рокови на испорака
- SSL на целиот сајт — без исклучок
Технички стапици
- Модулот бара нешто од серверот (најчесто одредена PHP верзија или екстензија). На несоодветен хостинг тоа завршува со тивка грешка при плаќање — затоа модулот и хостингот е подобро да се од исто место.
- Тест наспроти live податоци — класика: сè работи во тест, а на живо не, зашто останале старите податоци.
- Враќање на купувачот. Мора да има точна повратна адреса (return URL) — инаку клиентот плаќа, а нарачката не се затвора.
- Не чувајте податоци од картички. Никогаш. Тоа е работа на процесорот.
Алтернативи додека чекате
Не мора да чекате одобрување за да продавате: уплатница, плаќање при достава или фактура работат од прв ден. Картичките додајте ги кога ќе поминете низ постапката — а до тогаш продавницата веќе прима нарачки.
Извор за можностите на cPay: cpay.com.mk (јули 2026). Условите и роковите се менуваат и се разликуваат по банка — проверете кај вашата.